ខេត្តប៉ៃលិន៖ នគរបាលខេត្តប៉ៃលិនបានឃាត់ខ្លួនជនជាតិកូរ៉េម្នាក់ដែលមានជាប់ពាក់ព័ន្ធនឹងករណីជំរិតទារប្រាក់នៅក្នុងប្រទេសកូរ៉េបញ្ជូនទៅអគ្គស្នងការដ្ឋានគរបាលជាតិដើម្បីបន្តចំណាត់ការ។ ការឃាត់ខ្លួននេះធ្វើឡើងកាលពីព្រឹកថ្ងៃទី២៦ ខែមេសា ឆ្នាំ២០២២ម្សិលមិញ តាមរយៈកិច្ចសហការរវាងនគរបាលកម្ពុជា និងនគរបាលអន្តរជាតិក្រុងសេអ៊ូល ប្រទេសកូរ៉េខាងត្បូង។

ជនសង្ស័យជាជនជាតិកូរ៉េខាងត្បូង មានអាយុ ៥៥ឆ្នាំ ត្រូវបានរកឃើញថាបានគេចខ្លួនពីកូរ៉េមករស់នៅក្នុងខេត្តប៉ៃលិន កម្ពុជា នាពេលថ្មីនេះ នៅក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន។

ប្រភពពីស្នងការដ្ឋាននគរបាលខេត្តប៉ៃលិនបានឱ្យដឹងថា៖ «នគរបាលអន្តរជាតិក្រុង សេអ៊ូល (Seoul) ប្រទេសកូរ៉េខាងត្បូង បានស្នើសុំសមត្ថកិច្ចកម្ពុជាស្រាវជ្រាវ ស្វែងរកចាប់ខ្លួនជនសង្ស័យខាងលើ លុះពិនិត្យមើលទៅលើលិខិតឯកសារ ទើបដឹងថា ជនសង្ស័យរូបនេះ បានចូលមកលាក់ខ្លួននៅក្នុងខេត្តប៉ៃលិន ក៏ឱ្យនគរបាលធ្វើការស្រាវជ្រាវចាប់ឃាត់ខ្លួនតែម្តង»។

បច្ចុប្បន្ន ជនសង្ស័យខាងលើត្រូវបាននគរបាលខេត្តប៉ៃលិន បញ្ជូនខ្លួនតាមរថយន្តទៅអគ្គស្នងការនគរបាលជាតិ ដើម្បីដោះស្រាយតាមនីតិវិធីច្បាប់៕